www.time.mn

Public Media ХХК нь ‘On time’ уриатай www.time.mn сайтыг 2011 оны 11 дүгээр сар үүсгэн байгуулсан. 2014 оноос Медиа группийн харъяанд үйл ажиллагаагаа үргэлжлүүлж байгаа. (http://biznetwork.mn/c/Media+Group+LLC)

2015 оны байдлаар тус сайтын өдрийн хүртээмж 4% байсан бөгөөд хамгийн олон уншигчтай түгээмэл арван сайтад багтдаг. (Интернэт хэрэглэгчдийн судалгаа, ХХ, 2015 он). Харин alexa.com–ийн үзүүлэлтээр Монголын сайтууд дотроос 55 дугаарт жагсаж байна. (http://www.alexa.com/siteinfo/time.mn).

TIME.mn сайтын бодлогыг редакцийн багийнхан тодорхойлохдоо олон нийтэд хэрэгцээтэй мэдээллийг яг цагт нь шуурхай, тэнцвэртэй эх сурвалжаас хүргэж, хариуцлагатай мэргэжлийн сэтгүүл зүйг хөгжүүлэхийг зорин ажилладаг гэжээ. Тус сайт нь нийгэм, эдийн засаг, улс төр, дэлхий, нийслэл, спорт, нийтлэл гэсэн тогтмол булангуудтай.

“Медиа групп”-ын эзэмшдэг NTV телевизийн эфирийг шууд дамжуулдаг. Үүсгэн байгуулагч П.Сайнбилэг, сэтгүүлч мэргэжилтэй. Одоогоор МУ-ын Ерөнхийлөгчийн Олон нийттэй харилцах албаны даргаар ажиллаж байгаа. Тэрээр улс төрийн албанд томилогдсноор өөрийн байгуулсан time.mn сайтыг удирдахаа больж, Медиа группын мэдэлд ирсэн. Одоогоор Медиа группын захирал А.Баярбат сайтын бодлого, менежемэнтийг удирдан чиглүүлдэг. Тэрээр маркетинг, бизнесийн удирдлагаар мэргэшсэн.

Медиа групп нь Time.mn сайтаас гадна NTV телевиз, Гоодаль сэтгүүл, Нийслэл гайд сэтгүүл, Шинэ зууны радио FM107–ийг эзэмшдэг. Медиа группын хувьцааны 50 хувийг Шунхлай группийг үүсгэн байгуулагч, УИХ-ын гишүүн асан Г.Батхүү эзэмшдэг. Үлдсэн хувийг хэн эзэмшдэг нь тодорхой бус байна. Хөрөнгө оруулагч нь Монголын томоохон аж ахуйн нэгжийн нэг болох Шунхлай групп юм.