www.news.mn

Монгол Масс Медиа Групп 2007 оноос эхлэн тус сайтыг ажиллуулж эхэлсэн. 2012 оноос тус сайтыг “NEWS” агентлагт хувьчилсанаар үйл ажиллагаагаа бие даан явуулж байна. 2015 оны байдлаар тус сайтын өдрийн хүртээмж 18% бөгөөд мэдээ, мэдээллийн сайтуудын тэргүүлэгчдийн нэг юм. (Интернэт хэрэглэгчдийн судалгаа, ХХ, 2015 он). Харин alexa.com –ийн үзүүлэлтээр gogo.mn, ikon.mn сайтуудын дараа 10 дугаар байрт жагсаж байна. (http://www.alexa.com/siteinfo/news.mn)

2014 онд тус редакцаас хийсэн судалгаагаар өдөртөө давхардсан тоогоор 150 орчим мянган уншигчийн хандалттай, уншигчдын дийлэнх нь төрийн албан хаагч, олон улсын байгууллагууд, орон нутгийн захиргааныхан, бизнесийнхэн байна. Насны хувьд 35-аас дээш насныхан ихэвчлэн тус сайтаар зочилдог гэсэн дүн гарчээ. Нийгмийн бүхий л бүлгийнхэнд зориулсан улс төр, эдийн засаг, нийгмийн мэдээллийг түлхүү өгдөг. Бусад сайтуудаас сэтгүүл зүйн уламжлалт мэргэжлийн редакцтай гэдгээрээ ялгардаг. Тухайн өдрийн бэлтгэж буй контентийн 90 гаруй хувийг сэтгүүлчдээс бүрдсэн редакц бэлтгэж олон нийтэд түгээдэг. Технологи хөгжүүлэлтийн өөрийн нэгжгүй учир технологийн шинэчлэлээр бусад өрсөлдөгч сайтуудаас сул байдаг хэмээн дэд захирал Д.Нарантуяа хэллээ.

“NEWS” агентлаг нь Улс төр, эдийн засгийн мэдээллийн алба, Мэдээллийн алба, Шинэ контентийн алба, Топ контентийн алба, Тамгын газар гэсэн бүтэцтэйгээр ажиллаж байна.Ерөнхий эрхлэгч Б.Тэмүүлэн, тэрээр сэтгүүлч мэргэжилтэй, өдөр тутмын сонин болоод цахим хэвлэл мэдээллийн хэрэгсэлд олон жил ажиллаж буй туршлагатай. “NEWS” агентлагийн гол хөрөнгө оруулагч нь МУ-ын Ерөнхийлөгч Ц.Элбэгдорж гэсэн мэдээлэл бий ч батлагдаагүй. Гэхдээ эх сурвалжийн мэдээлсэнээр түүний эхнэрийн дүү Х.Болдбаатарын нэр дээр тус сайтын хувьцааны 70 хувь байдаг гэсэн мэдээлэл байна. Хөрөнгө оруулагч болон сурталчилгааны орлогын тухай мэдээллээ ирүүлээгүй.