Гэр бүлийн радио 104.5

Family Radio FM104.5 (Гэр бүлийн радио) нь бүсийн хэмжээнд буюу Улаанбаатар хотын төвийн зургаан дүүрэг, алслагдсан Багануур, Налайх дүүрэг болон Баянхонгор, Мөрөн хотуудын төвд нэвтрүүлгээ цацдаг хамгийн олон сонсогчтой радиогийн нэг юм. Тус радиог 2001 онд Салхи Энтертайнмент ХХК үүсгэн байгуулсан. Ерөнхий захирлаар Т.Батжаргал өнөөг хүртэл ажиллаж байна.

Долоо хоногт 77 цагийн нэвтрүүлгийг сонсогчиддоо хүргэдэг. Гэр бүл, түүний үнэ цэнэ, өсвөр насныхны хайр дурлал зэрэг сэдвээр олон төрлийн сонирхолтой нэвтрүүлгийг тогтмол явуулдагаараа онцлогтой. Тус радио нь гэр бүлийн сайн сайхныг дээдэлсэн, хувь хүний өөрчлөлт хөгжлийг дэмжсэн, шударга байдлыг эрхэмлэж сайн мэдээ бүрийг түгээнэ гэсэн уриатай ажилладаг.

Тус радиог шашны буюу Библийн урсгалын байгууллагаас санхүүждэг гэдэг боловч радиогийнхон үгүйсгэж, зөвхөн төлбөртэй нэвтрүүлэг цацдаг гэдэг. Арилжааны бусад радиотой харьцуулбал тогтвортой, хүртээмжтэй үйл ажиллагаа явуулсаар ирсэн. Улаанбаатар хотын хамгийн олон сонсогчтой радиог тэргүүлж байгаа бол орон нутагт МҮОНР-гийн дараа хоёрдугаарт орж байна. (Эх сурвалж: ХХ-гийн Хэвлэл мэдээллийн хэрэглэгч судалгаа 2015 оны 12 сар)

Гэр бүлийн радио нь гэр бүлийн боловсрол, зөвлөгөө, мэдээлэл, хүний ёс зүй, эрчүүд, эмэгтэйчүүд, хүүхдийн боловсролын нэвтрүүлэг бэлтгэн сонсогч олондоо хүргэдэг бөгөөд Библийн хичээлийг тусгай цагаар явуулдаг. Энэхүү нэвтрүүлэг нь “Ариун бичээс” нийгэмлэгтэй хамтран, төлбөртэй явагддаг нэвтрүүлэг болно.